Matapos nga ginpatawag sang pamunuan sang Barangay Tangub ang lalaki nga nakuhaan sang video nga naghanot sa isa ka nagabusong nga ido gamit ang tubo sa Purok San Roque, gilayon man ini nga nangayo sang pasensya sa publiko.
Isa ka video nga gin post sang Barangay, nagpangayo sang pasensya si alyas “Reggie” bangud sa iya nahimo sa ido.
Suno sa iya, nahimo niya ang pagpanakit bangud napuno na siya sa perwisyo nga gina-obra sang mga layaw nga ido sa ila lugar.
Dugang niya, ginapamatay sang mga ido nga layaw ang iya mga manok, kag nakaagi naman kagat ang iya bata, rason nga iya nahanot ang ido nga si Latlat.
Makaduha na ka beses nga nagreklamo si Reggie sa Barangay bangud sa nagadamo nga stray dogs sa ila lugar, apang indi man ini maimpound bangud puno na ang dog pound sang Bacolod City Veterinary Office.
Ginsiling man ni Punong Barangay Noli Villarosa nga ginpangabay sila sang CVO nga mag-obra anay sang temporaryo nga shelter sa barangay agud marescue ang mga ginareklamo nga stray dogs.
Sa karun indi pa maka-impound ang CVO sang mga ido bangud puno na ang dog pound.
Samtang padayon naman nga nagapaayo ang ido nga si Latlat sa Juan Veterinarian Animal Clinic bangud nabulag ang isa sini ka mata kag nahibaluan man nga pito na ka semana ini nga nagabusong.
[sibwp_form id=1]