Wala sa gihapon makilal-an ang nasapwan nga bangkay sang isa ka lalaki kahapon sa likod sang plaza sa Barangay 19-A sa siudad sang Victorias.
Nakahigot ang tiil sang biktima kag natabunan pa sang plastic kag packing tape ang iya guya. May note pa nga “I love drugs” ang biktima sang masapwan ang iya nga bangkay sang isa ka barangay tanod.
Suno kay Lt Col Eduardo Corpuz, hepe sang Victorias PNP, may ngalan pa sang isa ka persona nga nasulat sa placard nga sunod nga i target sang mga may kahimuan sang krimen.
Si Corpuz nag siling nga ila nag naistorya ang amo nga persona pero iya gin pahayag nga indi niya kilala ang gin patay.
Ginahibalo sang PNP kun may koneksyon ang amo nga persona sa biktima kag sa mga suspek.
Ang biktima ang suno sa pulis brutal nga ginpatay bangud sa nag crack ang iya nga ribs base sa post mortem examination kag gin utod ang iya nga duha ka dulunggan.
Posible suno sa pulis nga sa lain nga lugar gin patay ang biktima kag gin bilin lang sa area sang Victorias.
Nakig angut na ang Victorias PNP sa mga kaiping nga police stations agud makilal-an ang biktima.