Mga nagakaigo nga ahensya sang gobyerno ang kuntani mag usisa sa nagasaka nga presyo sang kalamay sa merkado.
Ini suno kay Negros Occidental Governor Eugenio Jose Lacson nga nagpahayag nga wala siya naga ugyon sa gina siling sugar crisis karon.
Matuod nga nagmahal ang presyo sa merkado kun sa diin nagdangat na sa 100 pesos ang kilo sang refined sugar, pero, may nagakaigo pa nga supply subong suno sa iya.
“I think there will be (shortage) that’s why the president agreed on 150,000 metric tons. Right now if you go to the market puno naman sang sugar”, suno kay Lacson.
Kun may nagpamentaha man sa presyo, suno kay Lacson indi ang mga planters.
“It’s always the traders. I guess agencies like the Department of Trade and Industry maybe can come in and find out why the prices are like that, but definitely it’s not the planters who are benefitting from these very high prices,” suno kay Lacson.
Yara sa idalom sang Department of Agriculture ang monitoring sang presyo sang kalamay pero suno sa DTI Negros Occidental sila ang nag patigayon na sang price monitoring kasunod man sang request gikan sa ila nga regional office.
Kasubong sa iban nga mga sugar planter, nagapati si Lacson nga ang pag import sang 150,000 metric tons sang kalamay base sa gin pahayag ni Presidente Ferdinand Marcos Jr bilang sabat sa gina lantaw kakulang sa supply, kuntani ang refined sugar.
Ini para indi man maapektuhan ang farm gate price sang kalamay labi na nga nagsugod na ang galing suno kay Lacson. Gina paabot nga ang pag import sang refined sugar maka pa hagan-hagan sang mataas nga presyo.
Dapat magiyahan ang industriya suno sa gobernador paagi sa pag pat-od kun kinahanglan gid bala mag import. Kun kinahangalan, ano ang nagakaigo nga volume, kag kun may importation, dapat mag aligmat batuk sa smuggling.
Sa pihak nga bahin, naga ugyon si Lacson sa nangin tikang ni Planters’ Representative sa sugar board nga si Aurelio Gerardo “Bodie” Valderrama nga indi mag resign kag hulaton na lamang amg desisyon sang iya nga appointing authority nga si Presidente Marcos.
Si Valderrama na lamang ang wala naka hatag sang iya resignation sa mga signatory sa Sugar Order number 4 nga gintawag sang Malacanang iligal.