Banwa sang La Castellana ang partial na nga naka bayad sang P1.2 million para sa masobra walo ka ektariya sang duta sa Barangay Robles nga maga serbe relocation site sang mga nawad-an balay sang mag-igo ang bagyo Tino.
Suno kay Remuel Lajo ang Information Officer sang banwa ang ginbayad sa duta nga nahamtang sa Hacienda Bacsay sa Barangay Robles ang gikan mismo sa pondo sang banwa.
Padayon man ang pagproseso sa mga dokumento nga kinahanglanon. Nakapadulong na sa area ang mga natungdan para sa site inspection kaangay sang NOCECO sa power lines kag ang nag survey sa duta. Ginahikot man ang para sa right of way.
Sa pihak nga bahin, ginapaabot ang releasing sang cheke para sa walo ka mga LGU nga magabaton sang pondo gikan sa P50 million pesos nga Presidential Assistance Fund nga gin-release sa probinsya. Ang walo na ka LGU nga apektado sang Bagyo Tino ang gintugyanan sang Negros Occidental sa pag hatag sini para sa mga pumuluyo kag sila na ang maga liquidate sini sa probinsya.
Tig P10 million ang ginpain para sa La Castellana, La Carlota City kag Moises Padilla, tig P5 million naman para sa Bago City, Binalbagan kag Hinigaran kag tig P2.5 million para sa Isabela kag Pontevedra.*