Kakulang sa police personnel sa Negros Oriental para sa gina paabot nga May Elections ang mapun-an na.
Kasunod sang ginpatigayon nga Regional Joint Security Control Center meeting sang Lunes, na-desisyunan nga ang 310 nga kulang sa Negros Oriental ang kuhaon gikan sa Bacolod City PNP.
Nagakasayuran sa karon nga na plastar na ang deployment sa Negros Island Region para sa May Elections. Paathag ni COMELEC Negros Island Region Director, Atty Lionel Marco Castillano nga wala sang dapat kabalak-an ang Bacolod City bangud ang pag pull out sang personnel temporaryo man lamang kag maga lawig sa tion sang piniliay.
Tatlo ka adlaw antes ang eleksyon gina patuman na ang send-off sang mga magaserbe sa pinilay. Samtang, ang damlag pa na deploy nga 200 ka pulis sa Negros Oriental gikan sa Police Regional Office 7 ang nabalik na sa PRO7 karon nga yara na ang NIR. Sang Biyernes ginsiling sang Negros Occidental PNP nga zero-zero na ang ila nga deployment ukon napun-an naman ang mga kulang.
“Yung kulang na 310 na personnel sa Negros Oriental para sa election kukunin diyan sa Bacolod City Police Office.
Sobra-sobra na sila sa Bacolod, more than 1,000 ang personnel. For election purposes lang yan. Pagkatapos ng election babalik din sila”, suno kay Castillano.
Sa pihak nga bahin, wala sang may namutikan nga intense political rivalry sa Negros Oriental labi na sa Third District. Matawhay suno kay Castillano kag ang away sa kampanya makita lamang sa social media. Wala man sang may na-monitor nga Private Armed Groups ukon PAGs.
Nagapabilin naman ang Guihulngan kag La Libertad sa red category kag ang nabilin nga mga banwa kag siudad sa yellow category. Gina paabot sa masunod nga semana maga pa gwa sang bag-o nga listahan sang areas of concern ang COMELEC.