Sa video ni Alemar Saren mabatian pa ang sunod-sunod nga mga lupok kag ang hilibuon sang residente sa pag engkwentrohanay sang 79th Infantry Battalion kag mga pulis batuk sa pito ka mga katapo sang Northern Negros Front sa Barangay Winaswasan, Calatrava, pasado las sais kaina sang aga.
Suno kay 79th IB Commander Lieutenant Colonel Arnel Calaoagan, nagluntad ang engkwentro bangud sa nagapadayon nga focus military operation para madakpan ang mga rebelde.
Naglawig ang engkwentro sa masobra dies minutos.
Nagapati ang militar nga yara sa lugar ang wanted nga NPA nga si Arnel Tapang nga may patong sa ulo nga isa ka milyon ka pesos.
Wala sang may napilasan sa bahin sang otoridad, samtang possible suno sa army may napilasan sa rebelde bangud sa mga dugo nga nakita sa encounter site.
Bangud sini, nagdeklarar sang class suspension si Mayor Marilyn Era sa lima ka mga barangay sa banwa sugod subong nga adlaw, until further notice.
Ini naga lakip sang Barangay Cambayobo, Hilub-ang , Winaswasan, Macasilao, kag Pantao.