Na operationalize na ang disinfection vehicle sang Department of Agriculture sa pag spray sa mga katubuhan nga apektado sang peste sa tubo ukon sang RSSI.
Suno kay Engr Jose Albert Barrogo, ang DA-Negros Island Region Director, sang Hwebes lamang natapos gamit ang disinfectant vehicle sa La Carlota kag karon yara na ini sa Cadiz City.
Naka schedule naman ang Sagay City sa Martes.
Sa report sang Sugar Regulatory Administration, ang red striped soft scale insect nga infestation sa mga katubuhan ang naglabot na sa 1,980.4 ka ektariya sa Negros Occidental as of June 26.
18 ka mga area sa probinsya ang na igo sang RSSI. Dala na diri ang La Castellana, La Carlota, Pontevedra, Bago City, Pulupandan, Murcia, Bacolod City, Talisay City, Don Salvador Benedicto, EB Magalona, Silay City, Victorias City, Manapla, Cadiz, Toboso, Calatrava, Sagay City kag Escalante City.
Ilakip naman ang kahalitan sa iban nga katubuhan sa Negros Oriental, Iloilo kag Capiz masobra sa 2,000 hectares ang kabilugan sa karon nga naapektuhan sang amo nga peste.
Damlag pa gin haylo ni SRA Administrator Pablo Luis Azcona ang tagsa ka LGU nga mag deklara sang state of calamity ukon state of emergency bahin sa RSSI agudto madasig man ang pag hikot sang assistance sa mga natungdan.
Suno kay Governor Eugenio Jose Lacson yara na ang desisyon sa tagsa ka LGU.
Wala pa man subong sang LGU sa Negros Occidental nga nag-declare sang state of emergency of calamity bangud sang RSSI.
“Didto na kami nag umpisa sa La Carlota kay ang research station to nila na kitaan sang RSSI. If I’m not mistaken, Monday to namon gin deploy, pero natapos na sila kahapon. Amo na gin-transfer na namon sa Cadiz City kay may request man si Cadiz City. We will be having a meeting by Monday sa SRA. Nag patawag man si Admin Azcona sang meeting, so didto na naman siguro ang pinaka latest nga update nga makuha namon sa meeting nila”, suno kay Barrogo.