Nakilal-an na ang apat ka mga suspetsado nga nagpatay sa isa ka active nga member sang Citizen Armed Force Geographical Unit sang Philippine Army sa Sitio Kabayabasan, Brgy. Montilla, banwa sang Moises Padilla sang Sabado.
Ang biktima ang ginkilala kay Joselito Raboy, 40 anyos, isa ka CAFGU kag na assign sa Delta Company sang 62nd Infantry Batallion, sa Upper Mamballo Brgy Quintin Remo, banwa man sang Moises Padilla.
Suno kay Police Major Jovito Bose, hepe sang Moises Padilla PNP, ang apat ka mga suspetsado ang nakilala pinaagi sa impormasyon kag datus sang Philippine Army kag mga intelligence unit sa palibot sang Moises Padilla.
May mga saksi man nga nagbulig sa pagkilala sang mga suspetsado.
Ginkumpirmar man ni Bose nga ang mga suspetsado ang kabahin sa SPARU Unit sang New People’s Army nga naka-base sa probinsya sang Negros Oriental.
Sa pihak nga bahin, ginpahayag sang pamilya ni Raboy nga wala nakabaton sang pagpamahog ang biktima antis ini ginpatay.