Spokesperson sang alkalde nga si Punong Barangay Caesar Distrito nagpahayag nga indi pwede magbaton sang donasyon ang katapo sang enforcement team halin sa mga market vendors
May mga ginakumpiskar nga isda, utan kag iban pa nga baligya ang katapo sang City Legal Office Enforcement Team nga masami gina donate sa charitable institution kun indi insigida nga magawad sang mga vendors sa merkado.
Ginpahayag ni Punong Barangay Caesar Distrito,spokesperson ni Mayor Albee Benitez nga ang mga confiscated products ang indi pwede hilabtan sang enforcement team kag indi man dapat sila magbaton sang donasyon ukon ano man nga ginahatag sang mga vendors nga maapektuhan sang ginapatuman nga clearing operation.
Damlag pa ginpa usisa sang alkalde ang reklamo sang pila ka mga manugbaligya isda sa Libertad Market matapos gin alegar nga ginluto sang katapo sang enforcement team ang mga produkto nga nakumpiskar halin sa ila sang nagligad nga Martes.
Ginpanginwala ini ni Enforcement Team Leader Rey Demisana nga nagpahayag nga ang naglapta nga litrato sang ginaluto nga isda sang enforcement team ang ginbakal antes ginpatuman ang clearing operation.
Dugang niya nga masami ang mga naga reklamo nga fish vendors halin sa Bagsakan kag sa kilid sang karsada amo man ang nagapamentaha sa ila kaupod nga fish vendor nga lehitimo nga nagabaligya sa sulod sang merkado.