May pagsaka sa kaso sang diarrhea ukon pag lupot sa Brgy Inolingan sa Moises Padilla.
Base sa datus sang Municipal Health Office, humalin sang December 4 tubtob 11, may yara sang 173 cases sang diarrhea ang na-record. Nagsugod batyag sang sintoma ang mga apektado nga pumuluyo December 1.
Kabahin sa mga apektado suno sa MHO mga evacuees kag mga pumuluyo sagwa sang evacuation centers.
Ginsiling ni Mayor Ella Garcia-Yulo, nga sang nagligad pa nga semana naka patuman na sang konsultasyon kag pag hatag sang bulong ang Department of Health upod ang Municipal Health Office.
Apektado ang spring nga water source sang amo nga barangay suno sa alkalde. Kun tig-ululan suno sa iya indi gid man malikawan ang kasubong nga problema.
Maka duha ka beses na sila nga nag patigayon sang test, kag positibo ini sa e. coli, rason nga gina abisuhan ang mga pumuluyo nga dapat laga-on ang tubig nga gina inom.
Ang banwa mismo ang nag distribute na sang mga bottled water.
Padayon nga naga abiso ang banwa sa pumuluyo nga ipasiguro nga safe ang tubig nga gina gamit paagi sa pag pabukal sini para mapangapinan ang ikaayong lawas.
“Ang chlorinator, wala to ga function. Hopefully nakay-o na kay on the process to sila magkay-o. ang guba gid sadto pagkadto ko to ang tubo gid ya sa isa ka sitio. Amo to ang ila priority mo. Kay ang instruction sang amon nga health kag sang DOH, indi man gid taas ang e. coli sa test sa water source, indi man siya alarming nga taas, pwede lang sya malaga. Naghatag na kami water”, suno kay Garcia-Yulo.*