Namutikan sang pulis sa Sipalay City ang isa ka salakyan nga may karga nga mga smuggled cigarettes paagi sa impormasyon gikan sa isa ka concerned citizen.
Padulong ang Toyota Revo nga salakyan sa Purok Isdaan, Zone 1 sa Brgy. Cartagena, Sipalay City sang ini ang ginkadtuan sang kapulisan kag naaktuhan ang driver nga naga-diskarga sang isa ka bukas nga karton sang sigarilyo.
Namangkot ang pulis sa driver kun nagabaligya siya sang sigarilyo, kag sang makita nga wala sang graphic health warning ang mga ini, ila siya nga gindakup sa paglapas sang Republic Act 10643 ukon ang Graphic Health Warnings Law.
Narekober sang kapulisan ang salakyan kag ang 20 ka karton nga may unod nga 1,000 reams sang smuggled cigarettes, kag nagabalor sang P460,000.
Nag-coordinate ang Sipalay PNP sa Bureau of Internal Revenue-Binalbagan agud i-verify sang authenticity sang nakumpiskar nga sigarilyo kag agud mahibaluan kun may nalapas nga tax laws kag regulations ang driver.*