P2.414 billion palang ukon 57.88 percent sang P4.171 billion nga loan sang siudad sa idalum sang administrasyon ni anay Mayor Alfredo Abelardo Benitez ang na release sang Development Bank of the Philippines as of September 30, 2026.
Ini ang sandig sa Partial Joint Committee Report sang ginapatigayon nga Comprehensive Review sang Sangguniang Panlungsod tuhoy sa mga loans sang siudad sa idalum sang administrasyon ni anay Mayor Bing Leonardia kag anay Mayor Benitez.
Suno kay Councilor Jude Thaddeus Sayson, pamuno sang Committee on Finance, may P1.757 billion pa sa gin loan ang wala ma release sa siudad kag ini ang isa sa importante nga bagay agud maklarohan ang diskusyon sang publiko may angut sa mga proyekto sang siudad nga gikan sa loan.
Dugang pa niya, may mga proyekto na nga nahuman samtang ang iban ang naga padayon pa.
Ang loan ang gintalana sa 17 ka mga development projects kaangay sang land acquisition, civic buildings, pagkaayo sang mga dalan, drainage, healthcare, environmental sustainability, kag iban pa nga mga public facilities.
Damlag pa, ginsiling ni Bacolod City Mayor Greg Gasataya nga halos tapos na ang P30.8 million nga motor pool sa Reclamation Area kag ang P67.9 million nga City Warehouse. Lakip pa sa mga proyekto sa idalum sang loan amo ang P280 million nga City Health Complex nga pwede naman magamit sang CHO suno sa alkalde.
Samtang sandig sa report sang SP, 51.19 percent palang nga nahuman ang P765 million nga legislative building samtang yara nasa 48.68 percent ang completion rate sang P413 million nga pagkaayo sang old city hall.
Nagpasalig man ang SP nga ila padayunon nga i-review ang status sang loan projects kag handa man sila nga ipakita ini sa publiko kun kumpleto na ang mga dokumento.
[sibwp_form id=1]