Kampanya kontra dengue ang ginpalab-ot sa mga barangay.
Suno kay Provincial Health Officer, Dr Girlie Pinongan, ila na ginpalab-ot sa mga barangay ang kampanya sang Department of Health nga Alas kwatro kontra Mosquito.
Paagi sa tagsa ka local government unit may pag paninlo sa kada adlaw nga patigayunon nga paga pamunuan sang kada barangay.
Las kwatro sang hapon masami nga naga ginuwa na ang mga lamok.
Abiso ni Pinongan mapamatukan ang dengue kun ang mga breeding sites sini ang ma guba ukon mapukan.
Ehemplo diri ang mga botelya sang softdrinks nga masami gina pabay-an, sarang ini maga serbe breeding site.
Karon nga may pag-ulan-ulan indi malikawan ang pag tipon sang mga tubig nga dapat bantayan man.
Naga pamutang man sang larvicide sa mga kanal.
As of February 22, may 1,012 ka dengue cases ang Negros Occidental ukon 421.65 percent nga mas mataas kun ipaanggid sa kasubong nga tion sang nagligad nga tuig. Anum ang dengue related deaths.
Nagapabilin ang siudad sang Bago nga may pinaka madamo nga dengue cases nga na-report.
“Gin-daily na gid na namon sa aton nga mga barangays. Kun lantawon mo ang breeding sites sang mosquito amo ang dapat bantayan kag tapnaon. Up to the level sang aton barangays gina patinlo na gid kag gina papangita ang mga breeding sites. Especially ang mga nag stagnant ta na bala nga botelya, ipakulob. Ang mga tires nga wala na gina gamit dira na ga ano ang mga mosquito. Especially subong may mga tubi daan, ga ulan-ulan”, suno kay Pinongan.