Supply sang manok sa Negros Occidental ang gina lantaw nga maapektuhan bangud sang halit nga tuga ni bagyo Odette.
Sa December 21 nga progress report sang Provincial Veterinary Office 1.2 million heads sang broiler ang nagkalamatay.
Suno kay Dr Renante Decena, mahimo nga pag abot sang Enero mabatyagan ang pag diutay sang supply sang manok, bisan pa gani sa pagsug-alaw na sang bag-ong tuig. Nagalab-ot sa 80,000 heads ang makonsumo kun holidays.
Mahimo nga 50,000 heads lamang ang ma supply suno kay Decena bangud sang epekto sang bagyo.
Gina abaga man sang mga integrators kag growers ang pag mahal sang feeds kag iban pa gid nga input nalakip na diri ang gasto sa pag gamit sang generator, dugang nga personnel bangud man sang kakulang sang kuryente. Kalabanan sa mga farms ang yara sa sur nga bahin sang Negros Occidental.
Balantayan ang sitwasyon lakip na ang presyo labi na nga gina patuman man ang price freeze.
Nagdangat na sa 608,707,082 ang balor sang halit sa kasapatan lakip na infrastructure sa report sang provincial veterinarian.