Kahalitan sang bagyo Tino sa Negros Occidental ang nagdangat na sa masobra P605 million. Samtang, sanday Secretary Christina Frasco sang Tourism kag Sonny Angara sang Education ang nagpadulong sa probinsya bilang tiglawas sang presidente sa pag pasiguro sang dugang nga assistance sa mga apektado.
Sa executive briefing nga ginpatigayon ni Negros Occidental Governor Eugenio Jose Lacson nanday Frasco kag Angara, nagdangat na sa masobra P605.4 million ang kahalitan.
P155 million pesos ang kahalitan sa pananum kag livestock suno kay Engr Jose Albert Barrogo ang Regional Director sang Department of Agriculture.
P22.5 million ang kahalitan sa fisheries kag damage sa infrastructure ang yara sa 427.9 million pesos.
Suno kay Frasco sila ang ginpadala ni President Ferdinand Marcos, Jr para ipalab-ot sa apektado nga pumuluyo nga yara ang gobyerno national sa pagbulig kag ipabatyag ang presensya sang national government tubtob nga liwat nga makabangon.
Mga food kag non food items, health related relief ang ipalab-ot lakip na ang medium term nga bulig para sa infrastructure kag shelter nga kinahanglanon.
May 7,876 ka mga balay ang nagkalaguba kag 49,382 naman ang partially damaged.
Suno kay Frasco personal nila nga ipadangat sa presidente ang sitwasyon kag concern sang mga LGU.
Upod si Governor Lacson, kag iban pa gid nga opisyales gikan sa gobyerno national, una nila nga ginbisitahan ang banwa sang Binalbagan. Ginsiling ni Mayor Emmanuel Aranda nga may P5 million pesos gikan sa presidential fund nga igahatag sa LGU.
Ginsiling man ni Aranda nga ginpahayag ni Sec Angara nga magabulig ang Office of the President sa pag-paayo sang dalan, eskwelahan kag taytay nga nagkalaguba. Kaayuhon ang tatay sa Biao suno sa iya nga isa ka daku nga bulig sa pumuluyo.*