Negros Occidental ang may yara sang 2,009,564 ka mga botante para sa May 2025 Elections.
Ini base sa datus nga gin release sang Commission on Elections – Negros Occidental matapos nga ginpatigayon na ang katapusan nga Election Registration Board Hearing.
May 13,004 ka mga presinto nga na establish kag 2,484 naman ang clustered precints.
Sa mga na register nga botante mas madamo ang kababainhan – 1,025,698 ang kalalakinhan naman 983,866.
Indi pa mapat-od suno kay Elections Supervisor, Ian Lee Ananoria, kun ika pila ang probinsya sa may pinaka madamo nga registered voters sa bilog nga pungsod.
Nalakip ang Negros Occidental sa mga nagliligad nga piniliay sa mga vote-rich provinces.
Kun ipaanggid sa nagligad nga Barangay kag SK Elections, suno kay Atty Ananoria, mas manubo sa 5,161 sa karon ang registered voters. 2,014,725 ang registered voters sa nagligad nga piniliay.
Suno kay Ananoria, mahimo tuga ini sang pagsaylo sang mga botante lakip na ang pag delist sang yadtong mga wala makaboto sa duha ka sunod-sunod nga mga piniliay.