Ini ang pahayag ni Bacolod City Mayor Greg Gasataya may angut sa pag relocate sang mga nabiktima sang sunog sa Purok Katilingban, Barangay 39 kag sa Purok Lampirong sa Barangay 2.
Ini matapos nga kadam-an sang mga biktima ang indi sa gihapon luyag nga maghalin sa ila mga gina-istaran.
Suno sa Bureau of Fire Protection ang mga nasunugan nga lugar ginakabig nga mga red zones ukon delikado sa sunog.
Dugang sang alkalde, duha lamang ka pamilya nga nasunugan sa Barangay 39 ang nagpabutyag nga handa sila mag relocate kun maproseso na sang siudad ang ila relocation.
Ang amo nga mga pamilya ang ipahamtang sa Arao Relocation Site sa Barangay Vista Alegre.
Ginahaylo sang siudad ang mga biktima nga mag relocate apang siling ni Gasataya, wala na lang sang pilitay.
Samtang napanagtag na sang siudad ang mga financial assistance sa mga nasunugan. Sandig sa record sang Department of Social Services and Development, 15,000 pesos ang ginhatag sa mga tag-iya sang balay nga totally destroyed kag 10,000 naman sa mga partially damaged.
Naghatag man ang siudad sang 5,000 para sa mga sharers kag renters nga nasunugan.
183 ka pamilya ang apektado sang sunog sa Barangay 39 kag 32 naman ka pamilya ang naapektohan sa sunog sa Barangay 2.*
[sibwp_form id=1]