Ginpresentar sang International Solid Waste Integrated Management Specialists Inc. ukon ISWIMS ang ila proposed schedule sang garbage collection sa mga punong barangay sa siudad sang Bacolod.
Ginpatigayon ang presentasyon kaupod ang BENRO, mga miyembro sang Sangguniang Panlungsod kag ginpangunahan ni Mayor Greg Gasataya, agud mabaton sang ISWIMS ang mga suhestiyon sang mga barangay antes i-finalize ang regular nga schedule sang pagkolekta sang basura, ilabi na sa inner roads kag subdivisions.
Suno sa ISWIMS, sa sulod sang isa ka semana, naka-kolekta na sila sang 10,512 cubic meters sang basura, lakip ang mga backlog antes sang opisyal nga pagsugod sang operasyon. Ginpahayag man nila nga may ginpatuman nga engineering improvement sa sanitary landfill sa Brgy. Felisa kag may 60 ka bag-o nga garbage trucks nga ipagamit para sa mas maayo nga serbisyo.*