Patay ang 39 anyos nga si Ivan Magbanua matapos ini ginluthang kagab-i sa Henrietta Village sa Barangay Singcang- Airport. Sa imbestigasyon sang PNP, ginsundan sang motorcycle riding suspects ang biktima nga sakay sa iya salakyan kag didto na sya gin paarakan sang lupok. Patay si Magbanua samtang pilason luwas naman ang iya sini upod nga driver.
Suno kay Major Joery Puerto, hepe sang Police Station 8, may kliyente ang security agency ni Magbanua nga may konplikto mismo sa sulod sang ila nga kompaniya kay may napahalin nga incorporator.
Posible naulamid sa away si Magbanua suno sa pulis kag siya ang nagabaton na nga daan sang pagpamahog.
Padayon karon ang imbestigasyon sang PNP.
Samtang, nasapwan naman kagab-i nga duguon sa eskenita ang isa ka lalaki sa Purok Sigay, Brgy. 2. Ang biktima ang ginkilala nga si Reynante Guillang, 44 anyos.
Suno sa PNP, naga tindog lang kagab-i sa eskenita ang biktima sang gintiro ini sang wala pa makilala nga persona. Padayon karon nga ginabulong sa ospital si Guillang. Ginahibalo man ka PNP ano ang motibo sa pagtiro sa iya.