Tatlo ka bulan na sa karon nga yara sa mga evacuation center ang mga pumuluyo nga sakop 6 kilometer danger zone.
December 9 sang naglupok ang bulkan Kanlaon rason nga ginpatuman ang evacuation kag tubtob sa karon indi ma pat-od kun tubtob san-o sila magapabilin sa evacuation centers.
Suno kay Office of the Civil Defense Donato Sermeno, III, nabuhinan man gid ang kadamuon sang yara sa evacuation centers bangud may pila sa mga apektado nga ginpakamaayo nga mag tenir upod sa ila nga mga himata. Pero ini sila ang gina monitor man. Sa report sang DSWD as of March 10, 12nn, 1,766 families ang naga pabilin sa evacuation center, 2,553 families naman ang outside of evacuation center. 93.8 million pesos ang balor sang humanitarian assistance nga na release sang DSWD, mga LGU kag mga NGO sa mga apektado.
Samtang, sang nagligad nga semana nagtapos naman ang feeding sang probinsya sa mga evacuees. Suno kay Sermeno, balik naman sa karon sa mga LGU ang pag pakaon sa mga apektado nga pumuluyo. Mahimo may yara pa sila sang pondo gikan sa ila nga Quick Response Fund.
May mga pending pa nga request gikan sa QRF sa national office ugaling gina hulat pa ang release sini. Samtang sini man lamang tigayon na ubos panagtag sang OCD ang mga tents sa mga LGU nga sarang magamit enkaso magsaka sa Alert Level 4 ang sitwasyon sa bulkan Kanlaon. Gina hatagan man sang konsiderasyon sa long term plan ang pag relocate sang yadtong sakop sang 6kilometer danger zone, sandig sa eksperiensya sa natabo sa bulkan Mayon suno kay Sermeno.
“Isa sa problema sa LGU kay nag untat, temporarily nag untat ang subsidy sang provincial government sa ila nga hot meals. Last week, Friday. Amo na ang isa Ka concern especially ni La Castellana. Gina follow-up namon ni RD Fernandez may financial request to sila. Sa national government. Wala pa ma release aton QRF sa national”, suno kay Sermeno.