Martes sang nagpatigayon ang Department of Energy sang online briefing sa mga local chief executive angut sa updates sa oil supply sang pungsod lakip na ang mga tikang nga gina patuman sa lokal nga lebel.
Suno kay Governor Eugenio Jose Lacson, ginsiling ni DOE Undersecretary Felix William Fuentebella nga may masobra sa 30 diyas nga supply sang produkto petrolyo ang pungsod.
Naga pangita naman ang Pilipinas sang iban pa gid nga makuhaan sang supply sang gatong.
Kabahin sa pagkinot, target sang mga LGU nga mapanubo sa 20 percent ang gina konsumo nga gatong. Gani gina paiway na ang indi mga importante nga mga biyahe.
Ginklaro man ni Lacson sa DOE nga ang mga sugar farms nga daan na naga bakal in bulk kaangay sang 5,000 tubtob 10,000 liters sa ila nga operation ang gina tugutan sa gihapon bangud kabahin ini sa ila nga normal operation kag indi makabig nga hoarding.
Ang private sector gina abisuhan ni Lacson nga magkinot man kag mag pangita sang paagi nga mapaiway ang tuman nga pag gamit sang mga salakyan.
Naga pangabay ang gobernador sa tanan nga mag pangamuyo sa sitwasyon nga gina atubang sa karon.*
[sibwp_form id=1]