Liwat nga ginpangkakas sang mga katapo sang Bacolod City Legal Office ang masobra sa 15 ka mga illegal structure nga nagasablag sa Palanca Road sa Barangay 16.
Ginsiling ni Levy Pangue, pamuno sang CLO Enforcement team, makapila na kabeses nga ila gin-clear ang lugar, apang nagabinalik ini sa gihapon.
Lunes sang aga, una nga ginpangkakas sang CLO ang mga moveable structures lakip na ang peryahan sang Barangay nga yara na mismo sa tunga sang dalan.
Dugang niya, natapos naman ang pyesta sang Barangay rason nga indi na sila pwedi makapadayon sang operasyon.
Gintinluan man sang Bacolod Environment and Natural Resources Office ang lugar bangud nagatinumpok na ang basura sa kilid sang dalan.
Samtang ang mga permanent structures, lakip na ang kontrobersyal nga carwash vending machine ni Punong Barangay Jason Ligaya, ang ginpasirad-an sang CLO kag balikon sa Myerkules agud tigayon na nga kakason sa dalan.
Si Ligaya ang nangin pinakauna nga punong barangay nga ginpasakaan kaso sang CLO bangud sa indi pag kooperar sini sa clearing operation sang siudad.
[sibwp_form id=1]