Ginklaro ni Bacolod City Mayor Greg Gasataya nga wala pa ma turn-over sang Department of Public Works and Highways sa siudad ang diversion channel ukon ang guluwaan sang tubig pakadto sa dagat sa may Reclamation Area.
Ini matapos nga nagbaha liwat ang dalan malapit sa amo nga area sang nagbubo ang ulan sang Martes.
Suno sa alkalde, may mga papeles pa nga ginaproseso ang DPWH antes ma turn-over sa siudad ang proyekto.
Ginsiling naman ni City Engineer Loben Ceballos, nga wala nagbukas ang guluwaan sang tubig sa diversion channel rason nga ginbaha ang lugar.
Sang gin-kadtuan ini sang City Engineer's Office, nakit-an nga naka kandado pa ang gate padulong sa diversion channel, rason nga ila pa ini gintaklas agud lang ma mano-mano buksan ang sluice gate ukon guluwaan sang baha padulong sa baybay.
Dugang ni Ceballos, sang nabuksan na ang sluice gate, madasig man nga nagtahaw ang baha sa dalan.
Nagpangabay na ang siudad sa DPWH nga i-redesign ang amo nga proyekto ukon padakuon ang guluwaan sang tubig agud tigayon na nga malikawan ang posibli liwat nga pagbaha.
Isa man sa ginahingyo sang CEO sa DPWH, nga kun pwedi ipabilin nalang nga bukas sa ano man nga oras ang sluice gate, magluwas nalang kun may ginapaabot nga pagtaas sang tubig sa baybay.
[sibwp_form id=1]