Nagpatigayon sang isa ka rally ang nagkalain-lain nga mga grupo sa Bacolod City para mag pangayo sang sabat sa Department of Energy sa adlaw-adlaw nga rotational brownouts.
Ginsiling sang Presidente sang Bukluran ng Mangagawang Pilipino Negros nga si Jun Año, nga ini na ang tion agud mag transition na ang gobyerno sa renewable energy.
Suno sa iya, mga dalagko lamang nga korporasyon ang naga control sang kuryente, apang ang mga konsumedor sa gihapon ang nagaka apektohan.
Nagapati ang grupo, indi sustainable ang coal kag gas bilang source sang kuryente, rason nga mas bentaha suno sa ila ang renewable energy, ilabi na ang solar panel para sa tagsa ka balay.
Suportado man nila ang hagna nga ginaduso ni Bacolod City Lone District Representative Alfredo Abelardo Benitez agud mausisa ang matood nga rason sa likod sang adlaw adlaw na nga red kay yellow alert sa Visayas Grid.
Suno kay Año, makatilingala nga butang kun ngaa dungan nagsira ang mga planta nga gintunaan sang pagkakulang sang power supply.
Samtang, ginsiling naman ni Juvy Montecalbo, pamuno sang Bacolod Fisherfolk Federation, nga dako man ang pagpanghalit sang rotational brownouts sa mga mangingisda.
Suno sa iya, bangud sa halos adlaw-adlaw nga brownouts, masami nga nagakalub-ok ang ila mga gina freezer nga isda, rason nga indi na ini mabaligya.
Ginasinggitan man sang mga grupo ang pag resign ni Department of Energy Secretary Sharon Garin bangud suno sa ila, wala man siya naga perform.
[sibwp_form id=1]