Nagapangayo sang bulig ang pamilya sang Grade 2 pupil nga nalumos sa irigasyon nga sakop sang Purok Kaaghu-an, Barangay Ma-ao sa syudad sang Bago, Negros Occidental.
Bangud nga tuman kapigado, wala gid sang ikasarang ang pamilya sang 8-anyos nga bata nga babaye agud nga ini siya ang mapalubong.
Martes sang aga, nagapanglaba sa irigasyon ang biktima upod ang iya 13 anyos nga magulang.
Suno kay Police Capt. Emman Anacleto, deputy chief sang Bago City PNP, ginhambalan sang magulang nga lalaki ang manghod nga indi magpaligo sa irigasyon bangud naga-ulan sa bukid kag posible magsulog ang daludo ang tubig.
Sang nagapanghalay na ang magulang, gulpi naglumpat ang manghod kag wala na ini madeparahan.
Nag-gwa sa imbestigasyon sang kapulisan nga posible naanud sang mabaskog nga daludo sang tubig ang biktima.
Gintinguhaan sang magulang nga mag-dive sa irigasyon kag pangitaon ang iya manghod, tubtob nga nag-abot ang mga personnel sang Ma-ao Volunteer Rescue Unit.
Gindala ang biktima sa Bago City Hospital apang matapos ang pila ka minutos, siya ang nagtaliwan samtang gina-revive.
Naga-obra ang iloy sang mag-utod sa Bago proper sang nagluntad ang insidente.
Sa karon, may pila na ka mga indibidwal kag mga opisyales sang barangay kag syudad ang nagbulig sa pamilya sang bata.
Para sa luyag maghatag sang bulig, magpakig-angut lang sa pamilya sang bata paagi sa cellphone number: 09530537620.