Softball team sang BCNHS mangin tiglawas sang Asia-Pacific sa Junior League Softball World Series.
Matapos nga nangin kampyeon ang 14-under soft ball team sang Bacolod City National High School sa Little League Philippine Series National Finals 2026 sa Ilocos Norte sang Abril, handa na ini nga mag-atubang sa world stage nga hinampang.
Sa Agosto 2 tubtob 8 sini nga tuig, ang Bacolod City National Highschool ang mangin tiglawas sang Asia Pacific sa Junior League Softball World Series nga pagahiwaton sa Washington sa USA.
Kahapon nga adlaw, nag courtesy visit ang bug-os nga team nga ginalakipan sang 14 ka mga atleta nga naga edad 14 anyos panubo.
Ila ginpangabay ang siudad nga masuportahan sila para sa world series.
Suno kay Atty Mark Steven Mayo, Bacolod City Administrator, nga positibo man ang response sang siudad kag handa ini nga maghatag sang pinansyal nga bulig para sa mga atleta.
Ang kadalag-an sang BCNHS sa national series ang nangin inspirasyon man sang siudad agud iduso nga mangin regional training center ang Bacolod City para sa hampang nga soft ball.
Bilang pasidungog man sa mga atleta sang BCNHS, ginaduso na nga paubrahan sang dako nga training center para sa softball ang amo nga eskwelahan.
Kumpyansa man ang siudad sa mga tiglawas sang Bacolod nga sarang ini maka compete sa mga atelta sang iban nga pungsod.
[sibwp_form id=1]