Ginakabig nga maragtas sang mga Catholic church leaders, tumulu-o, kag lokal nga mga opisyales sang gobyerno ang pagbukas sang bag-o nga St. Francis Xavier Cathedral sa Kabankalan City.
Nahamtang ang bag-o nga balay palangamuyu-an sa tatlo ka ektarya nga duta sa Hacienda Clementina, Brgy. Talubangi nga ginapanag-iyahan sang pamilya Jalandoni.
Ginpangunahan ni His Eminence, Jose Lazaro Cardinal Advincula Jr., Archbishop of Manila ang Solemn Dedication sang nasambit nga cathedral.
Nagbuylog sa Dedication sang katedral ang linibo ka mga Katoliko, kapin 10 ka mga bishops, archbishops kag mga kapari-an gikan sa nagkalain-lain nga lugar.
Nagpasalamat si Kabankalan Bishop, His Excellency, Most Rev. Louie Galbines sa tanan nga nagbulig agud matukod ang cathedral.
Ginsiling ni Kabankalan Mayor Benjie Miranda nga dako nga bagay para sa syudad nga natapos na tukod kag nahuman ang cathedral matapos ang napulo ka tuig.
Para kay Negros Occidental Governor Eugenio Lacson, daku nga pasalamatan nga nalampuwasan ang mga pagtilaw nga na-eksperyensyahan sang probinsya ilabi na southern Negros.