60 ka mga pamalay sa nabukid nga bahin sang Moises Padilla tigayon na nga natakdan sang linya sang kuryente sang NOCECO.
Mabudlay ang alagyan pakadto sa Sitio Agogolo, Barangay Macagahay sa banwa sang Moises Padilla kag mas mabudlay ang sitwasyon sa ila lugar kay wala man sang kuryente.
Pero sang nagligad gid lang nga semana natagaan sang kasanag ang kadulom. Matapos ang malawig nga tini-on natagaan na sang linya sang kuryente ang amo nga sitio pinaagi sa Negros Occidental Electric Cooperative ukon NOCECO.
Masobra sa P5.2M ang pondo nga ginpa-in sang kooperatiba para tigayon sila nga mabutangan sang kuryente.
Ini ang pinaka malapad nga project sa idalom sang Sitio Electrification Program ukon SEP sa kinto distrito sang Negros Occidental.
Suno kay 5th Dist. Cong. Dino Yulo, indi nangin mahapos para sa NOCECO ang ini nga proyekto bangud sang kahimtangan sang area nga ginakabig nga isa ka Geographically Isolated and Disadvantaged Area gani dako ang pag pasalamat niya sa kooperatiba nga tigayon ini nila nga nahuman.
Si Mayor Ella Garcia-Yulo nagpasalamat sa NOCECO kag kay Yulo para sa ila pag panikasog nga matigayon ang ini nga proyekto. Ginpasalamatan niya man si Vice Mayor Felix Mathias Segundo "Pimpoy" Yulo III kag ang Sangguniang Bayan sa pag-approve sang iya request nga indi na mag sukot sang government fees para sa proyekto.
Ginkalipay sang mga residente nga natagaan na gid man sang katumanan ang madugay na nila nga handum.
[sibwp_form id=1]