Sa mga wala pa maka bisita sa Panaad sa Negros Festival, Gobernador ang nagahaylo nga magbisita kag mag upod sa sinadya sa katapusan nga duha ka adlaw.
Karon sa gab-i masaksihan ang Lin-ay sang Negros nga sa masami gina dugukan. Suno kay Governor Eugenio Jose Lacson, ang pag padulong sang mga naga bisita sa Panaad ang naga depende sa natalana nga activity sa amo nga adlaw. Indi man ma negar nga may epekto ang kainiton sang panahon subong sa naga bisita, isa pa may klase sa karon. Suno kay Lacson, kadam-an sa naga kadto after office hours na. Mas nangin maayo naman ang sales performance nga na record sa nagligad nga tatlo ka adlaw kun ipaanggid sa 2023. 6.6 million pesos ang nabenta sa nagligad nga tatlo ka adlaw gikan sa mga LGU pavilion kag sa mga nagkalain-lain nga mga trade fair kag booth. Sang 2023, 6.2 million pesos ang benta sa sulod sang tatlo ka adlaw. Ang EB Magalona ang nagpanguna sa sales sa mga LGU pavilions. Naga sunod naman ang Calatrava kag Don Salvador Benedicto. Nalipay naman ang gobernador nga indi lamang isa ka LGU ang naga dominate sa sales kag may yara sang kumpetisyon. Sang nagliligad nga tinuig naga panguna sa masami ang Cadiz LGU bangud sang ila uga nga produkto.