Ginabuga nga sulfur dioxide sang bulkan Kanlaon liwat nagdangat sa masobra 10,000 ka tonelada.
Ini ang ikalima nga pinakamataas nga gas emission sang Bulkan Kanlaon humalin sang ginatakos na ang gas emission.
Sa 10 pm advisory nga ginpagwa sang Philippine Institute of Volcanology ang Seismology ukon PHIVOLCS, antes naglupok ang bulkan sang Hunyo 3 sini nga tuig yara lang sa masobra 1,000 ka tonelada ang average sang gina buga sini nga sulfur dioxide.
Pagkatapos sang paglupok, naga average naman ang gas emission sang bulkan sa masobra sa 4,000 tonelada kada adlaw.
Kagab-i yara na sa 10,075 tons per day ang average nga sulfur dioxide ang ginabuga sang bulkan.
Napanimahuan ang asupre sa pila ka mga barangay sa Canlaon City.
Paandam sang PHIVOLCS, likawan ang exposure sa sulfur dioxide.
Magtinir sa sulod balay kag magpanarado sang puertahan kag mga bentana.
Mag gamit sang N-95 mask kun naga panimaho ang asupre.
Mag inum sang madamo nga tubig para malikawan ang throat inflammation.
Nagapabilin sa gihapon sa Alert Level 2, buot silingon, may naga padayon pa nga mga aktibidad sa bulkan.
Ang pagbuga sang mataas nga volume sang sulfur dioxide nagakahulugan sang posibilidad sang paglupok sang bulkan kag pag butang sa bulkan sa mas mataas nga alert level.