Full road closure ginapaabot ipatuman sa Burgos Street dungan sa deployment sang 250 ka mga kapulisan sa mga patyo sa Bacolod para sa Pista Minatay.
Magapabilin nga naka-full alert ang katapo sang Bacolod City Police Office para sa natalana nga pagdumdom sang Pista Minatay sa Noviembre 1 tubtob 2.
Kabahin sa pagpabaskog sang kampanya para mapasiguro ang matawhay nga tigkalalag, suno kay BCPO Director Police Colonel Joeresty Coronica ang pag deploy sila sang dugang nga 250 ka mga police personnel sang BCPO sa 14 ka mga patyo sa siudad.
Ipahamtang man ang mga Police Assistance Desks para mapaiway ang pagpasulod sang mga patalom kag makahulubog nga ilimnon.
Samtang, ginapaabot man nga ipatuman sang Bacolod Traffic Authority Office ang full road closure sa portion sang dalan Burgos nga yara sa atubang sang Bacolod North Public Cemetery sa Nobyembre 1.
Ginsiling ni BTAO deputy Jose Antonio Robello nga kasubong sang naandan, magapatuman sila sang re-routing agud malikawan ang pag-gutok sang mga salakyan sa atubang sang patyo.
Isa sa mga gintalana nga baligyaan sang bulak sa pista minatay ang dalan Burgos gani posible magadagsa diri ang mga nagaduaw sa ila mga minatay.