Digicast Negros

Food court sa Libertad Annex ginaplano ihatag sa vendors nga wala pwesto

Food court sa Libertad Market Annex Building ginaplano para sa mga vendors nga madulaan sang pwesto sa merkado.

Ginpaisol sang Committee on Markets and Slaughterhouse ang natalana kuntani nga pag-raffle sang mga stall sa bag-o kaayo nga Libertad Market annex building sa Marso 7.

Ini agud maid-id nga ma-validate sang komitiba ang masterlist sang mga market vendors, ilabi na nga madamo sa mga naga-claim nga original vendors ang wala sa listahan.

Suno kay Councilor Celia Flor, may plano ang siudad nga magtukod sang food court sa second floor sang merkado agud maganyat ang mga fruit vendors kag iban pa nga magsaylo sang pwesto sa ibabaw nga panalgan nga gintalana para sa dry goods.

Ginalauman sang konsehal nga kun matigayon ang plano sarang matagaan sang pwesto ang iban pa nga manugbaligya indi mangin mapilian sa raffle.

Nagligad lang nga semana sang gin-postpone sang siudad ang pag-raffle sang stalls bangud sang tension sa tunga sang mga vendors nga wala madala sa masterlist. May masobra 300 ang mga market vendors nga yara sa listahan sang local market committee.

Masobra lang sa 220 ang stalls sa annex building.

Ginadihon man karon sang konseho ang ordinansa nga magatalana sang dugang nga lugar nga mangin plastaran sang iban pa nga vendors nga sarang madulaan sang pwesto sa merkado.

Exit mobile version
Skip to toolbar