Arestado ang anay pulis nga babaye sa ginpatigayon nga drug buy-bust operation sa Purok Dol-dol, Barangay Poblacion 2 sa syudad sang Sagay, Negros Occidental, Miyerkules nga adlaw.
Sa report sang Police Regional Office-Negros Island Region, nakuha sa subject nga ginkilala kay alyas “Tata”, 30-anyos, ang 45 grams sang ginasuspetsuhan shabu nga nagabalor P306,000.
Magluwas sa iligal nga droga, nakarekober man ang Sagay PNP sang isa ka caliber .45 pistol, isa ka magazine kag lima ka mga bala.
Suno sa regional office sang PNP, ang anay pulis ang na-dismiss sa serbisyo humalin Oktubre 31, 2023 bangud sa kaso nga Grave Neglect of Duty tungod nag AWOL ini ukon nag-absent nga wala sang official leave.
Residente sang Brgy. Old Sagay sa Sagay City ang nasambit nga anay pulis, nga karon detained sa Sagay Police Station.
Kaso nga pagsupak sa Comprehensive Dangerous Drugs Act of 2002 kag Comprehensive Firearms and Ammunition Regulation Act ang ipasaka sang kapulisan batuk sa anay pulis.
Ulihi nga na-assign ang anay pulis sa Regional Personnel Holding and Accounting Unit sang PRO-6 sa Iloilo City antes siya ang ginkakas sa serbisyo.