Naglambot sa masobra 1.7 milyones pesos nga balor sang ginasuspetsuhan shabu ang nakuha sa buy-bust operation nga ginpatigayon sang Philippine Drug Enforcement Agency kaupod ang Police Station 2 kahapon sa Purok Tahong, Barangay 2 siudad sang Bacolod.
Suno kay Police Station 2 commander Police Captain Paul Vincent Pendon, ang nadakpan ginkilala kay Arnold Caso, 19 anyos, estudyante kag residente sang ano man nga lugar.
Dugang pa ni Pendon, si Caso ang ginakabig nga High Value Individual kag tatlo ka semana nga gin-surveillance antes ginpatigayon ang operasyon.
Ila man usisaon ang report nga myembro si Caso sang isa ka dako nga sindikato.
Nakuha sa iya ang 50 ka heat sealed transparent plastic sachets sang ginasuspetsuhan shabu nga may kabug-aton nga 255 grams. Si Caso ang detained karon sa custodial facility sang Police Station 2.