Patay ang 48-anyos kag empleyado sang isa ka insurance company matapos nga gintiro sa National Highway sa may Sitio Sumulog, Brgy. Bulwangan sa San Carlos City kaina sang aga.
Suno sa kay Police Major Ryan Villasario ang Deputy Chief of Police sang San Carlos City PNP, sakay sa iya nga motorsiklo si Jonathan Yap, pakadto sa iya ulubrahan sang hinali na lang ini nga gintiro sang wala pa makilala nga persona.
Dugang pa niya, una nga ginreport sa PNP nga vehicular accident ang nagluntad nga insidente pero sang ulihi natukiban nga may igo sang bala sa ulo ang biktima nga posible nangin rason sa iya nga pagkatumba.
Ang trabaho sang biktima ang isa sa mga gina lantaw nga rason sang pnp sa pagpatay sa iya pero nagapadayon pa ng ila nga imbestigasyon para matumod ang suspek.