Ginsugdan sa isa ka misa sa steps sang Provincial Capitol nga gin pamunuan ni Bacolod Bishop Patricio Buzon ang panawagan. Suno sa Obispo, indi pwede nga malipatan ang natabo sa EDSA.
Panawagan man ini suno kay Buzon sang pag repent bangud gin usikan ang kuntani mga nalab-ot sang EDSA kag karon dapat nga mangin responsive ang pumuluyo kaangay na lamang sang pag away kontra korapsyon kag sa political dynasty.
40 ka tuig ang nakaligad gin updan sang simbahan ang panawagan sang pumuluyo para sa pagbag-o sang pang gobyerno, subong kadungan sang ika 40 nga anibersaryo sang EDSA People Power Revolution, kaupod sa gihapon sang nagkalain-lain nga sektor ang kaparian kag mga madre sa pagpanawagan sang pagbag-o sa pang gobyerno sa Pilipinas.
Ginsiling sang Secretary General sang Bayan Negros nga si Noli Rosales, humalin sadto sa panahon sang amay nga Marcos isyu na ang korapsyon sa gobyerno kag sa subong isyu sa gihapon ang korapsyon sa adminstrasyon sang anak nga Marcos.
Panawagan nila ang pagkakas sa pwesto sa kay President Ferdinand Marcos, Jr. kag Vice President Sara Duterte bangud sang pila ka mga isyu sang korapsyon nga ginahabuy sa duha.
Sa pihak nga bahin ang Federation of Urban Poor temprano pa nga nagtipon sa istatwa ni anay Senador Benigno Ninoy Aquino sa dalan Araneta sa pag dumdom sang Edsa People Power Revolution nga nag patalsik sa diktaturya.*
[sibwp_form id=1]