Daku nga bulig sa kampanya kontra sa ASF ang dugang nga personnel kag pulis gikan sa Bacolod para sa Joint ASF Task Force.
Suno kay OIC Provincial Veterinarian, Dr Placeda Lemana, humalin sang gin tuga ang joint ASF Task Force, may 40 tanan ka mga job order workers nga gindeploy ang siudad sang Bacolod para magbulig sa pag bantay sa mga puerto sang siudad batuk sa pagsulod sang mga pork kag pork meat products gikan sa mga lugar nga may ASF cases.
Suno kay Lemana, ang pag deploy sang apat ka mga pulis sa puerto sa Banago kag anum sa Bredco ang nag pasulhay sang ila nga operation labi na nga mas mangin mahapos ang pagpatuman sang mga inspection sa mga nagasulod sa puerto.
“Kay tungod may ara kita partner nga PNP, mas naghapos ang pag apprehend sang mga product kag ma open gid naton ang mga karga nila”, suno kay Lemana.
Ginahugtan ang pagbantay labi na karon nga may lima na ka mga banwa sa probinsya sang Iloilo ang may ASF cases. Sa pinaka ulihi nga datus sang ASF Task Force 128 ka kilo sang pork kag pork products ang nakumpiska sa mga puerto kag airport. Ini ang gikan sa Iloilo kag Pampanga suno kay Lemana.