Humalin sang ginakulang ang paracetamol sa Metro Manila, nagpaandam na ang food and drug administration sa publiko batuk sa walo tanan ka mga paracetamol products nga natalupangdan gina-peke.
Si Dr. Chris Sorongon, deputy for medical data and analsis sang Bacolod Emergency Operations Center nagsiling nga nakabaton sila sang report angut sa isa ka baligyaan nga nagabaligya sang peke nga mga paracetamol.
Ini ang ila na gina-usisa kadungan sa paghinyo sang bulig gikan sa Department of Trade and Industry.
Suno naman kay Rachel Ann Nufable, provincial director sang DTI-Negros Occidental, wala pa sang nabaton nga reklamu ang ila opisina angut sa posible paglapta sang peke nga mga paracetamol products sa probinsya.
Pero nagpanugyan siya sa publiko nga dapat mangin maid-id sa ginapamakal nga bulong ilabi na ang paracetamol kag ginakinahanglan nga sa lehitimo nga mga botika magbakal agud makasigurado sa ginapabakal nga produkto.
Ang Bacolod City Health Office ang naga-monitor man sa mga supply sang paracetamol kag suno sa ila may nagakaigo pa nga supply bisan pa may duha na ka mga brands nga halos out of stocks na sa mga botika sa siudad.
Ang National Bureau of Investigation kag Criminal Investigation and Detection Group ang sarang man mapalapitan sang mga tag-reklamu nga posible mabiktima sang mga nagabaligya sang peke nga bulong ilabi na sa mga black market.