Maga-sugod na sini nga Sabado, Disyembre 13, ang pag distribute sang Emergency Cash Transfer sang DSWD para sa mga residente nga nagkalaguba ang balay bangud sang Bagyo Tino.
Suno kay Bacolod City Mayor Greg Gasataya, matapos ang meeting sang Martes kaupod ang DSSD kag DSWD, natalana na ang pagpagwa sang ₱114.9 milyon nga pondo para sa una nga batch sang payout.
Ang una nga batch sang makabaton sang Emergency Cash Transfer amo ang mga residente sang Barangay 1 tubtob 41 para sa numbered barangays. Sunod naman ang payout para sa mga barangay halin Alangilan tubtob Felisa sa alphabetical order.
Magalakip ini sang 3,430 ka totally destroyed nga mga puluy-an kun sa diin ang mga tag-iya sang balay makabaton sang tig ₱10,325, samtang 14,823 naman ka partially damaged households ang makabaton sang ₱5,369.
Ginpahayag man ni Gasataya, nga ang nabilin nga mga benepisyaryo sang partially damaged category makabaton sang ila ayuda sa Enero.
Ginpangabay man sang alkalde sa DSWD nga kon mahimo, matingob ang payout, apang indi ini masarangan sang ahensya bangud sa kulang nga disbursing personnel.
Sa kabug-usan, ₱240 milyon ang gin-allocate sang DSWD para sa Bacolod para sa duha ka batch sang payout.*