Draft sang Joint Venture Agreement para sa public discussion kag deliberation natalana ipa-gwa sa madason semana.
Ang pagtalana sang shares, assets kag liabilities pati na collectibles sang Central Negros Electric Cooperative pila lamang sa mangin kaundan sang ginadihon nga Joint Venture Agreement sa tunga sang distribution utility kag Ignite Power.
Suno kay Ceneco Acting General Manager Atty. Arnel Lapore, nangin maayo ang dalagan sang due diligence sa tunga nila sang Ignite Power.
Gani ginapaabot niya nga sa madason semana maga gwa na ang draft sang JVA nga natalana para sa public discussion kag deliberation.
Samtang ang grupo sang Amlig Kuryente kag katapo sang Responsible Supervisory and Confidential Union of Employees sang Ceneco, nag file na sang opposition sa mga natungdan nga ahensya agud mapunggan ang JVA.
Nagapati sila nga mas maayo nga magpabilin bilang cooperative ang Ceneco bangud indi man makabenepisyo ang mga kunsomidor kun pribado na nga kumpanya ang magadumala sa distribution utility.