Gin-assign nga Regional Director sang Department of Health para sa Negros Island Region ang nag-courtesy call kaina sang aga kay Governor Eugenio Jose Lacson.
Suno kay Dr Nikka Hao nga anay DOH Regional Director sang Region 2, nabaton niya ang iya assignment nga magpamuno sang DOH NIR sang nagligad nga semana.
Yara siya sa Region 6 karon kag gina paabot nga iya man pagabisitahan dason ang Region 7 bilang kabahin na sang pag plastar sang logistics kag personnel para sa DOH NIR nga ang opisina ipahamtang sa Dumaguete City.
Sa karon gina lantaw anay ang pag hulam sang personnel gikan sa DOH Region 6 kag 7 pero sa tion nga maplastar na ang tanan kag may plantilla may kaugalingon nga staffing pattern ang DOH NIR.
Suno kay Dr Adriano Suba-an ang DOH Western Visayas Regional Director nalakip man sa iga plastar kag turn-over amo ang Corazon Locsin Montelibano Memorial Regional Hospital nga naga serbe nga isahanon nga tertiary training hospital sa bilog nga NIR.
Samtang ginhingadlan naman sang Commission on Elections ang mangin acting Regional Executive Director sang NIR kag ini sa persona ni Atty Lionel Marco Castillano nga gikan sa Region 7.
Suno kay Governor Eugenio Jose Lacson nalipay siya sa madasig nga pag plastar sang tanan.
Naga hulat pa man siya sang pag convene sang technical working group.