Ginsuguran na sang Anti Swine Fever Task Force ang pag disinfect sang tangkal sa Barangay Taculing sa Bacolod kun diin napatay ang duha ka mga baboy nga nagpositibo sa African Swine Fever sang Biyernes.
Luwas sa Barangay Taculing, ginaduso man sang task force ang temporary closure sang slaughterhouse sa Barangay Handumanan para sa igapatigayon nga disinfection, kabahin sang tikang agud mapaiway ang paglapta sang masakit sa baboy.
Suno kay City Legal Officer Romeo Carlos Ting, Jr., tuyo sang City Veterinary Office nga mapatuman ang disinfection sa ihawan kada aga agud mapadayon ang operation kun gab-i.
Padayon man ang monitoring kag testing sang task force sa mga backyard hog farm.
Sa Barangay Felisa, nag negatibo naman sa hog cholera test ang 4 pa ka mga baboy.
Naghinyo naman ang siudad sa Department of Agriculture-Bureau of Animal Industry nga mapabilin anay ang testing machine sa siudad agud mapabaskog pa ang testing sa mga hog farm.