Sa pitik pa lang sang iya mga tiil kag mga kumpas ang iya nga mga kamot, makasiling ka nga dancer ang lady traffic enforcer nga si Hazel Nagar.
Sa intersection sang Hernaez Street kag Corazon Aquino Drive nga atubang sang Police Station 6 na assign ang 46 anyos nga dancing lady traffic enforcer.
Istorya ni Hazel, anum na siya ka tuig nga naga sulay sa ulan kag init sa tunga sang kalsada agud lang makabulig sa pamilya.
Madamo sa mga motorista ang nagakalingaw kun si Hazel na ang nagapatunga sa dalan para magmando sa lakat sang trapiko. bisan mga netizens ang iya napalipay.
Si Hazel isa man sa mga choreographers sa Bacolod nga amo ang sa likod sang kadalag-an sang mga masskara dancers sa pila ka mga kabarangayan.
Pero magluwas sa pagsaot, siya man ang sagad mag drawing.
Si Hazel ang anak sang nagtaliwan nga si anay punong barangay sancho nagar nga isa man sa mga kilala nga katapo sang media.
Antes pa man nangin traffic enforcer, nagtrabaho na anay bilang hospital staff si Hazel matapos nga maka graduate sa midwifery nga korso.
Ugaling nagpasimpalad siya nga magtrabaho sa Kuwait agud lang makabulig sa iya pamilya.
Ginakalipay niya nga sa pihak sang pagkambyo sang administrasyon naka serbisyo gihapon siya bilang traffic enforcer.
Para kay Hazel, isa ka bugay nga mapadayon niya ang trabaho bilang traffic enforcer agud man makaserbisyo sa siudad bisan pa nagkambyo na ang kolor sang iya uniporme.