Bacolod City Legal Enforcement Team nagpatuman sang clearing operation sa dalan Lopez Jaena kag Libertad Market. Luyag sang siudad nga mapabilin nga matawhay ang dalan Lopez Jaena pakadto Libertad Market nga masami nagagutok ang lakat sang trapiko kun peak hours.
Gani humalin kahapon nagpatuman sang clearing operation ang City Legal Office enforcement team batuk sa mga naga-double park nga salakyan sa alagyan.
Ginsubay nila halin bangga Patyo asta Libertad Market agud mapasiguro nga wala bisan tricycle ukon trisikad nga masami naga park kag nagalaksam sang dalan.
Suno kay Rey Demisana, pamuno sang enforcement team nga ila man ginsiguro nga pati mga sidewalk kag market vendors nga nagabaligya sa gwa sang merkado ang
wala nagalapaw sa gin-designate sa ila nga area. Sini man nga bulan suguran sang siudad pinaagi sa enforcement team ang pag-regulate sang mga ambulant vendors, ilabi na mga nagabaligya pagkaon.
Ini kabahin sa mga tikang agud mapahagan-hagan ang pag-gutok sang lakat sang trapiko kag mapasiguro nga limpyo kag safe kaunon ang ila produkto.