Department of Agriculture sa karon ang naga pangita man sang pamaagi agudto mabuligan ang mga rice farmers sa manubo nga presyo sang baklanay sang humay.
Suno kay Engr Jose Albert Barrogo ang regional director sang Department of Agriculture NIR, sang nagligad lamang nga semana nag sugod ang ani.
Gina paabot nila nga sa ika duha nga semana sang Setyembre magasaka na ang volume sang supply bangud maga full swing na ang ani.
Pero baklanay sang presyo sang humay ang ila nga namutikan nga barato.
Sa Bago area, may 15 pesos kada kilo ang pinaka pataas kag may P12 kada kilo nga baklanay.
Indi na makabawi ang mangunguma sa P12 ang kilo bangud ang operational cost ukon ang magasto sa pag produce sang kada kilo ang yara sa P14.50 kag ini naga depende man sa variety.
Gani ila gina lantaw ang paglunsar sang partnership upod sa isa ka pribado nga grupo ang Eco-Agri kun sa diin ang baklanay sang humay ang mas mataas.
Pilot area ang Bago suno sa iya.
Samtang, padayon pa ang pag inventory nila sang stocks sang bugas sa merkado para mapat-od kun ano kadamo ang supply sang imported nga bugas kag local nga bugas.
Sang Setyembre 1 nagsugod ang suspension sang rice importation nga magalawig sang 60 diyas.
Tinutuyo sang amo nga tikang nga mabuligan ang mga rice farmers labi na nga sa bulan sang Setyembre nagasugod ang ani.
Samtang, gina paabot naman sang mga mangunguma nga may pagsaka sa ila nga rice production karon nga tuig suno kay Barrogo.
“Isa na siya sa gina pamensaran namon kun papaano masolusyunan and I was able to tap sang private partnership nga inug-launch namon sa Friday. So may ara kami inug – launch nga sistema together with Eco-Agri sa kay Mr Ramon Uy amo na isa sa nakita namon nga solusyon nga makabulig sa farmers when it comes sa rice”, suno kay Barrogo.