Isa sa gina lantaw karon sang Department of Agriculture amo ang posible manipulation sa presyo sang baboy sa merkado sa Visayas kag Mindanao.
Para sa gobernador kun may kasubong nga sitwasyon dapat ini nga usisaon sang ahensya.
Sa national nga press conference sang DA sini lamang, ila ginsiling nga sila ang maga coordinate sa tagsa ka mga local government units paagi sa local price coordinating council para mapat-od kun ano gid ang rason sa mataas nga retail price sa karne sang baboy.
May pagsaka sa presyo sa mga merkado sa Visayas kag Mindanao bisan pa nga naga pabilin suno sa ila sa 180 pesos ang kada kilo sang farmgate price sang baboy.
Sa merkado sa Bacolod yara sa 400 pesos ang presyo sang kilo sang baboy.
Gani para kay Governor Eugenio Jose Lacson dapat nga usisaon ini sang DA.
Pero ang nabaton nga impormasyon ni Lacson amo nga amat-amat naman karon nga naga nubo ang presyo sang baboy labi na nga nagbukas na ang Bacolod sang border sini kag nagtugot sang pagpasulod sang gina paabot mas madamo nga supply.