Dead on arrival sa Dr. Ramon B. Gustilo Hospital ang Criminology graduate samtang nakaangkon naman sang malubha nga mga pilas ang angkas sini matapos sila ang makabunggo sa sugata nga truck sa national highway sang Hacienda Guikay, Barangay Purisima sa banwa sang Manapla, Negros Occidental, kaina Biyernes sang aga.
Ginsiling ni Police Capt. Marion Vicente Buenaflor, deputy chief sang Manapla Police, padulong Cadiz City ang motorsiklo nga ginamaneho ni Rolando Moldes III, angkas sini ang isa ka babayi, sang sila ang nag-isi-isi kag nagsaylo sa pihak nga lane kun sa diin nakabunggo sila sa nagasugata nga truck, nga padulong naman sa Victorias City.
Yara karon sa kustodiya sang Manapla Police Station ang driver sang truck.
Nagtapos sa kurso nga Criminology si Moldes sa Colegio de Sta. Ana De Victorias Inc. kag siya ang isa man ka choreographer.