Mahumok nga golden brown nga crust, creamy ang fillings… Ini ang sekreto sa empanada ni Via Torres sang 17th Food House sa Silay City.
Sa may Zamora Street sa Barangay 3 sa Silay City nahamtang ang ila nga baligyaan ang dalan mismo nga naga connect sa atubang sang city hall. Ang gwa sang balay sang lola ni Via ila ginhimo nga gamay nga cafe.
December 2021 nagsugod si via sa pagbaton sang orders asta nga may adlaw adlaw na nga naga pangita sang iya nga creamy chicken empanada.
Nakataopos siya sang kurso nga food tech, sa eskwelahan niya natun-an ang ini nga recipe. Halin sa crust pakadto sa fillings, siya tanan ang naga preparar. Mas mahapos na lang subong ang pagputos sang empanada kay may yara na sang hurmahan nga mabakal indi parehos sang una nga mano mano pa. Gina deep fry niya ini sa soya oil para healthy. Pagkatapos prito, indi oily ang crust sang iya empanada.
Suno kay Via, antes napatay ang ila kamagulang sang nagligad nga tuig, nag ayo ini sa iya nga suguran ang pag negosyo sang empanada kay pinasahi ang iya nga timplada.
Subong may mga naga bakal na sa iya kag gina dala sa Manila. Ang iya nga empanada ang gina display man sang tourism office sang Silay sa Robinsons Place Bacolod.
Halin sa creamy chicken may ham and chesse kag koren sausage ang egg empanada naman siya nga gina himo. Indi magnubo sa 150 ka empnada ang gina order sa kada adlaw.
Sadto anay si Via naga trabaho sa isa ka hotel pero subong nga gina padalagan niya na ang iya nga kaugalingon nga negosyo nalipay siya kay wala na siya sang boss kag ang iya na lang nga gin problema sa kada adlaw ang mag lagas sa kadamuon sang iya orders. Ara sa ila nga Facebook page nga the 17th Food House ang ila contact details.