Matapos maglumpat, wala na makabutwa pa ang manguguma sa gina bansagan nga “Covidlandia” sa Sipalay City ukon ang Cansibit Pit sa ruins sang nagsira nga Maricalum Mining sa Purok Malipayon Barangay San Jose, Sipalay City Domingo sang hapon.
Ginkilala kay alias Reyland ang mangunguma nga na missing nga taga Baranggay Baclao, Cauayan.
Suno sa kay Dionilo Bogtae ang DRRMO coordinator sang Sipalay City, gilayon nila nga gintawgan sang divers sang Philippine Coast Guard para mapangita ang amo nga persona.
May mga portion sang pit nga nagalab-ot sa 25 meters ang kadalumon sang tubig gani mabudlay ang pagsalom.
May lake abe nga nagporma sa area. Sang nagdulom na, temporaryo nga gin-untat ang pagpangita.
Lunes sang aga may nagpahibalo sa DRRMO nga naglutaw ang bangkay sang biktima gani gilayon ini nga ginkadtuan kag ginkuha.
Suno pa kay Bogtae, may ordinansa nga naga dumili sang swimming sa area kag may mga signages nga nabutang diri pero ginakakas sang mga naga kadto sa lugar.
Nakig sugilanon na ang CDRRMO sa barangay para ipaisra ang “Covidlandia” para indi na madugangan ang insidente sang pagkalumos kay sang nagligad nga tuig may nalumos man diri.
Ginbansagan ini nga “Covidlandia” kay sang tion sang pandemic nangin popular ini nga kaladtuan para mag swimming ang mga pumuluyo.*