Councilor Celia Flor nagpasalig sa mga Manokan vendors nga istoryahon si Mayor Albee Benitez para matagaan sila sang extension para mabayaran ang ila utang sa siudad.
Sa 17 ka mga stall owners sa Manokan Country, 3 diri ang naka fully paid na sang ila utang sa siudad.
Suno kay Councilor Celia Flor, pamuno sang Committee on Markets and Slaughterhouse, nga sa ila pagsinapol upod sa mga stall owners iya ginpasalig nga kun nagabayad na gid man sang utang ang mga stall owners magasugilanon siya kay Mayor Albee Benitez nga matagaan sila sang extension sa pagbayad sang arrears.
Halin sa P8.6M, may masobra na lang sa P6M ang nabilin nga utang sang mga vendors sa Manokan Country.
Nagpahayag si Mayor Albee Benitez nga final na ang iya desisyon nga indi na i-condone ang penalties kag ang ginhatag nga September 30 nga deadline para sa mga manokan vendors.
Sarang mapahalin sa pwesto ang mga stall owners nga indi makabayad sang utang kag i-auction sang siudad ang mga interesado ang mabakante nila nga pwesto suno sa alkalde.
Pero nagalaum gihapon ang katapo sang Manokan Country Vendors Association nga matagaan sila sang dugang nga panahon antes pa man sarang mapahalin karon nga nagahilapit na ang Masskara Celebration.